Мазыранку Ірыну Левіну, якую сілавікі затрымалі ля анкадыспансера і якой неабходная аперацыя па перасадцы касцявога мозгу, асудзілі на чатыры гады абмежавання волі без накіравання ў папраўчую ўстанову. Пра гэта паведамляе «Гомельская Вясна».
Справу Левінай Гомельскі абласны суд пачаў разглядаць у канцы снежня мінулага года. Жанчыну абвінавачвалі паводле арт. 361−4 КК (Спрыянне экстрэмісцкай дзейнасці). Праваабаронцы мяркуюць, што Ірына Левіна была затрыманая па «справе Гаюна».
Цяпер праваабаронцы атрымалі інфармацыю, што жанчыне прызначылі чатыры гады абмежавання волі без накіравання ў папраўчую ўстанову, а таксама штраф у памеры 500 базавых велічынь — 22,5 тысячы рублёў.
Нагадаем, Ірыну Левіну затрымалі 25 чэрвеня 2025 года ля анкадыспансера ў Мазыры. Сведкамі гэтага сталі наведнікі і супрацоўнікі медыцынскай установы, якія і паведамілі падрабязнасці праваабаронцам.
Левіна была змешчаная ў следчы ізалятар № 3 У Гомелі. У СІЗА здароўе жанчыны пагоршылася, і ёй дазволілі спачатку застацца ў бальніцы, а потым — дома.
У снежні 2025 года стала вядома, што Ірына рыхтуецца да аперацыі па перасадцы касцявога мозгу. Але, як паведамлялі праваабаронцам медыкі, жанчына не наважвалася паехаць у Мінскі навукова-практычны цэнтр хірургіі, транспланталогіі і гематалогіі для правядзення неабходных медпрацэдур, бо баялася, што адтуль яе забяруць у суд, і яна не зможа завяршыць аперацыю.