Грамадскія працы або адміністрацыйны арышт выступаюць «дадатковым стымулам» для пошуку працы беларусам, якія стаяць на прафілактычным уліку ў міліцыі. Пра гэта расказаў кіраўнік МУС Іван Кубракоў 25 лютага, прадстаўляючы дэпутатам законапраект «Пра змяненне законаў па пытаннях прафілактыкі правапарушэнняў».
Дакумент, які прэзентаваў у ніжняй палаце парламента кіраўнік міліцэйскага ведамства, закліканы палепшыць прафілактычную працу з падуліковымі грамадзянамі. Сярод іх і тыя, каго міліцыянты ўзялі на аловак за хатні гвалт.
Законапраект дазволіць браць на кантроль дзве новыя катэгорыі правапарушальнікаў: тых, хто вызваліўся з лекава-працоўных прафілакторыяў, і асуджаных на пакаранне ў выглядзе штрафу.
Дакумент таксама абавяжа беспрацоўных падуліковых вырашаць пытанне працаўладкавання. Для «ўхілістаў» прадугледжаная адміністрацыйная адказнасць.
Як паведаміў дэпутатам Іван Кубракоў, грамадскія працы або арышт маюць «станоўчую сацыяльную скіраванасць і эканамічны эфект».
Яны выступаюць «дадатковым стымулам для пошуку працы» і выключаюць залішнюю фінансавую нагрузку на сямейны бюджэт, як, напрыклад, штрафы, аплата якіх нярэдка становіцца абавязкам не саміх парушальнікаў, а іх блізкіх.
Прапанаваны кіраўніком МУС законапраект прыняты ў першым чытанні.